فطور ضاحك.. التواصل الانتخابي دخل لمرحلة اذا لم تستحي فافعل ماشئت

ها واحد صباح الخير ، صباح جديد من صباحات الحملة الانتخابية و لي نشطات لينا بطولة الساركازم فهاد البلاد السيعيدة .

ويييه شبعنا ضحك صراحة كتجي تقلب على شي حزب دار شوية تاع الابداع فخرجاتو اليومية التواصلية مع الساكنة و الله مكيبان لك ابداع ،لبارح كنراقب بالليل حصيلة هذه الخرجات و طبعا على مواقع التواصل الاجتماعي اما على مستوى الشارع فلي مبغاش اتفهم ليا ان الاحزاب كتبقى فالزنقة فوق التاسعة ليلا و الناس مجبرين ادخلو لديورهم مع التاسعة ليلا وحتى المحلات التجارية ، كنبقى نسول مع راسي هادو معامن كيتواصلو لبارح عصرت عليهم فالزنقة كنكتاشف أن فالليل فين كيكونو التجمعات فالمكاتب على غفلة منا و من رجال السلطة اللي كيقولو كلشي دخل انعس ارا نرخفوا شوية الخدمة.
تما كيبدا التواصل المغربي الخالص فيما يخص الانتخابات و كتبدى الوعود و مساومات، لان المواطن اللي كيقبل على راسو اخرق قانون دارتو السلطة حماية ليه اولا، وامشي فوق التوقيت المرخص و ادير تجمع باش اسمع لواحد المرشح كان قدامه اليوم كامل باش ادير اللي بغى اذن هنا كتحضر ظروف الليل و شنو كيوقع فظروف الليل مكايعلمو غير الله عز وجل ،هادشي بلا منهضرو على اللغة تاع التواصل فالحملة اللي بصاح غير جيب يافمي وقول واحد كان كيحلم ابيع دوا لبرغوت فالسوق لقى مكبر الصوت تاع الحملة مفتوح و اعطاوه اوصل رسالة الرسالة ،و واحد ملقى ميقول بدا كيحنحن للناخبين كيف العود ،اما رئيس الحكومة فالخرجة السينمائية تاعو برجال الامن الخاص بوحدها .

السيد متيق ان المغاربة كلهم قاريين كيمد لمول لحانوت فواحد الدوار الورقة و تيقول ليه ها البرنامج الانتخابي قراه والافظع ان البرنامج مكتوب بالعربية و التاجر كيتكلم مع رئيس الحكومة بالسوسية و لكن رئيس الحكومة باقي متشبث بالتواصل بالعربية وكانه بغى يوصل ليهم جملة ( انا لست منكم كنحتاجكم غير من انتخابات لانتخابات) الحاصول اذا لم تستحي فاصنع ماشئت .