علاش غادي نصوت هاد العام

محمد من أكادير (معلم) ; غادي نصوت لأنني مؤمن أن التغيير يأتي من صناديق الاقتراع و انني كمواطن يجب أن أساهم في التغيير قد اخطىء التقدير و لكن الأكيد أنني سأحاسب من اخترتهم عن طواعية ان يمثلوني في المؤسسات و أن يترافعوا عني وعن باقي الساكنة يبقى معيار المحاسبة هو ما يجب أن نشتغل عليه كمجتمع مواطنين ومؤسسات لأنه أظنه يختلف في درجته بين المواطنين و المؤسسات .

نجاة تكيوين (محاسبة ): طبعا غادي نصوت مزال مقنعني حتى حزب صراحة ولكن غادي نصوت لأنني بعد عدة تجارب تاع المقاطعة لقيت راسي كنساهم فان واحد الحزب طلع و جر بلادنا للظلام جوج تاع المرات و اننا لاننا قاطعنا ولات حساباته السياسية تراهن على المقاطعين و على انخفاض نسبة المشاركة ودبا كنقول نصوت و نحاول نشارك في تغيير الوجوه الدائمة لي كتطلع للتسيير و نعطيو فرص لوجوه جديدة .
امين ايت ملول ( عامل ): بيني و بينكم غادي نصوت و لكن غادي نلوحها خاوية غادي نصوت غير لان الباطرون تاعنا مرشح وقال لينا غادي ادينا الطرونسبور نصوتو و لي مشى صوت امشي بحالو و نهار مخلص غادي نمشي و لكن و الله ما نشهد الزور غادي نلوحها خاوية و تحسب ملغاة حيت الباطرون تاعنا كون بغا ادير مزيان كون دارو معانا حنا بعدا عاد اديرو مع المواطنين تاعو .
علاش مغاديش نصوت

محمد انزكان (استاذ متعاقد) : وعلاش غادي نصوت على واحد الناس بيعوا لينا الوهم و عيشونا فمغرب تاع تراجع الحريات و الا امن المجتمعي ، كتقرا حتى تعيا باش تشتاغل مهنة تضمن لك استقرار مهني كتلقى راسك ملاوح بين المظاهرات و الاقتطاعات و انت كتغوت على انتزاع واحد الحق قريتي عليه و دوزتي المباراة و نجحتي و لكن في أي لحظة تقدر تلقى راسك فالشارع انا شخصيا مبقاتش عندي الثقة فهاد المنتخبين وخا كتبدل الوجوه هي فقط تتوارى عن الأنظار و تزرع وسطنا وجها تتحدث مكانها لا ابغى يأكل الثومة ماشي بفمي انا و بفم الفقراء لا استاذة مغاديش نصوت علما انني مسجل وصوتت ف 2016.
مونية الدشيرة (عاملة في حمام): منكدبش عليك اختي انا كنخرج للحملة مع واحد الحزب ولكن والله منصوت على شي واحد نمشي نتسراح كل نهار كنخرج من صباح حتى للعشية نفرق الأوراق باش مع المغرب ندي 300 درهم اصلا هوما جاو عندنا لانهم عارفين اننا واقفات على الخدمة اما كل حلو لينا غير الحمامات ماعندنا مانديرو بالحملة تاعهم نمشيو نخدمو على اولادنا راه الدخول المدرسي هدا المهم هداك لي غادي اطلع راه عارف راسو اللهم نقولبوه حنا هاد عشر ايام اما هو راه غادي اتبرع خمس سنين .

عبد السلام محامي ( أكادير): بكل صراحة مغاديش نصوت لان التصويت هو أمانة وأنا في ظل كل هاد التراجعات الحقوقية والمجتمعية لي كنعيشوها كنقول نخلي امانتي عندي حسن ليا التعاقدات لي درنا مع الدولة والمؤسسات من 2011 لدابا كانت غير حبر على ورقة و الناس لي كنا بغيناهم اترافعوا علينا خذلونا باسم الدين و دبا كنشوفو محاولة تزويج المال للسياسة اذن غادي نزيدو نغرقو فالريع السياسي اللهم ابعد صوتي على كل هاته
.الغوغاء.
بين مؤيد و معارض تبقى محطة الانتخابات محطة التمرين على الديمقراطية بامتياز و مرحلة امتحان مواطنة الشعب المغربي الذي سيقول كلمته يوم 8 شتنبر 2021 بالمشاركة أو عدمها . للاشارة كل الذين شاركوا في الاستقصاء مسجلين باللوائح الانتخابية و يؤكدون أنهم ليسوا مقاطعين للعملية الانتخابية لكن ممتنعين عن التصويت فقط .