فطور ضاحك.. العمارية و ارحل هي نصيب حزب المصباح من حملة انتخابات شتنبر 2021

صباح الحملة الانتخابية اللي مبقيناش عارفينها باش غادي تسالي و حتى معامن غادي تسالي الحاصول كل نهار و رزقوا فالضحك المبكي لي واقع فالساحة السياسية تاع بلادنا .

حزب القنديل لي وصل لمرحلة الخرف السياسي و شاط ليه غير تخاريف و الصبيانية لبارح كنتفاجؤو بتجار سوق الأحد بمدينة اكادير هازينهم فاحسن عمارية و فعوض ما يعشقو على النبي اللي كانوا مسيرين هاد الحزب يكذبو بسميته ، تجار السوق اختاروا شعار ارحل فالحقيقة عمارية متناهاش لعدوك قبل صديقك ولكن شنو نقول لكم المغاربة مكينستوش وخا كيسامحو و نفس التصرف داروه شباب فدرب السلطان فالدار البيضاء يعني الناس ماشي محرشة و لكن مفقوصة على هاد التمرميدة لي دار لنا حزب فايديه و احلف عليها .

ولكن وخا هاد العماريات المشوهة كاملة كنتفاجؤو بالرباح هو خوتو فوق واحد المنصة مع واحد المغني قالك لك كيشطحو الدبكة و كيديرو بيها الحملة الانتخابية فالمغرب دبا ولات الدبكة حلال وشاليني حرام ولات الموسيقى التركية حلال و العيطة حرام واش هادو اجسادهم فالمغرب و عقلهم عند أردوغان و لا كيسحاب لهم يوم الحساب غادي اكون بالتركية الحاصول هاد الناس تعلمو هادي بزاف تاع السنين انهم يشطحوا على جراح المغاربة ببرودة دم و لكن امكن اليوم لمغاربة فهموا الدرس و ان الجنة والنار مكلف بيهم الله عز و جل و ماشي حزب سياسي .