فطور ضاحك مع انتخابات 2021… الحملة الانتخابية و الاعلام لي ماعندو فلوس كلامو مسوس

عاوتاني ماشي صباح الخير لانه ميمكنش نتسناو الخير وحنا كنتبعوا الحملة الانتخابية و هادشي لواقع فيها خصوصا ملي كتشوف طغيان بزاف تاع الخروقات و لي البطل تاع اغلبها حزب على راسو واحد ياحسرة كان وزير جوج مرات واحد كيقدم راسو انه هو اغنى واحد فالمغرب و لكن عزيزة عليه كرشو مزال بغى ياكل و يزيد ياكل. ولكن فالحملة كيبان انه كلا ووكل و لكن شكون وكل لانه رجل اعمال ذكي فالتشلهيب مشى وكل بعض من المحسوبين على السلطة الرابعة و اللي خرج لينا بتدوينة على صفحته الفايسبوكية كيقول لنا ان هاد الراجل درويش و مستهدف من شخصيات نافذة فالبلاد.

معرفتش علاش متستهدفش فاش كان وزير و الفلاحة كتموت بالجوع و العطش و لا فاش لونسا خرجات كتحذر المغاربة من النعناع يلاه غادي اتستهدف .

و رجع لينا ففيديو على الموقع الرسمي هاد المرة لي كيشتاغل فيه و لي كيبان انه مبرع اشهارات مزوقة بالحمام و بدا كيقول لنا نهاكم الله على داك الدرويش راه الله اعمرها دار و ضريف و لكن مقدرش اقول لنا الحصيلة تاعه فولايتين و لا حتى شكل الحملة تاعه لي غير الاسطول تاع الطموبيلات لي كيتحرك فيها المغاربة كيشوفوه غير فالمسلسلات التركية لي كيمتلو فيها العصابات .

المهم الحمامة اوغلو محيحة فهاد سبع ايام تاع المشماش و من بعد نشوفو غير هو السي تيجيني الا كان راجل مزيان ادير تشبيب رجال المال و الاعمال و القيادات ماشي نفرضو التشبيب غير على البوفرية لي معندهمش طموبيلات و لا امكانيات ليوم صباح فالدشيرة و عشية مراكش و بالليل فتاغازوت الحاصول السي تيجيني بصحتك الاشهار و متيقش المثل لي كيقول لي معندو فلوس كلامو مسوس .