حوار.. بروفايل و ثلاثة اسئلة ( الحلقة 2)
المناضلة اليسارية ابتسام الثبات نتمناك بخير و اجتزتي الوعكة الصحية بامان نفتتح الجلسة بامان
-شكون هي ابتسام الثبات
شكرا نحن هنا نصارع من الاجل البقاء الحياة كلها وعكاة لكن نواجه. شكرا ليكم موقع مغرب تايمز على استجوابي كشابة كدير السياسة. بتسام التبات أستاذة، 33 سنة عضوة مجموعة نساء شابات من أجل الديمقراطية .
1- ابتسام من اقصى اليسار الى اليسار الديمقراطي مسيرة طويلة و مفصلية شنو اي خلاك تامني ان النضال من داخل المؤسسات كيدير التغيير
من النضال في صفوف فصيل الطلبة القاعدين التقدميين الى النضال داخل الحزب الاشتراكي الموحد ، مسيرة لم تكن بالسهلة ، اللي خلاني نآمن بأن النضال من داخل المؤسسات كيدير التغيير هو إيماني أننا في ظل هذه الشروط و هاذ الظروف مايمكنش نفكرو فالثورة كآداة لتغيير جدري لان شروطها مامتوفراش و بالتالي بالي بأن الإصلاح او النضال من داخل المؤسسات ممكن يغير الكثير و آمنت بمشروع الحزب الاشتراكي الموحد و اشتغلت من داخلو و بعدها من داخل فدرالية اليسار الإطار اللي متشبتين بيه اليوم لأننا كنحلمو ببناء الحزب الاشتراكي الكبييير و اللي مايمكنش يكون إلا بالوحدة .
2-ابتسام الثبات لان المناسبة شرط و حنا وسط الحملة الانتخابية اعلنتي على حسابك بالفايسبوك انك ستقاطعين الانتخابات رغم دعمك لفدرالية اليسار في حملات سابقة شنو خلاك ترجعي للمقاطعة
ماغنشاركش فالانتخابات لانه ماكايناش قوة سياسية الان اللي تقدر تغير موازين القوى لصالح الحقوق و الكرامة الإنسانية و حريات المواطنين و المواطنات ، ماغنصوتش ببساطة لانه كايين معتقلين سياسية و معتقلي الرأي اللي تسلبات منهم حريتهم فقط حيت انتاقدو السياسات العمومية، أيضا كاينين عندنا و حنا فالقرن 21 مناطق مامتوفراش فيها شروط العيش ، عندنا نساء كيعانيو الويلات فالحياة اليومية ، فالماعامل فالحقول ، عندنا نساء فالجبل كيموتو و هما كيدولو حيت ماكينش سبيطارات ، مدرسة عمومية هشة ، قطاع صحي مترهل ؟
هاد الشي كامل و كنشوفو بأن المؤسسات المنتخبة ،ماقادراش تجاوب على الإشكالات المجتمعية الحقيقية ديال المواطنين و عموم الطبقات الشعبية.
المشكل راه ماشي شكلي لكن المشكل في عدم توفرنا على بنية سياسية مؤهلة لممارسة ديمقراطية حقيقية مبنية على ربط المسؤولية بالمحاسبة و النقد و المساءلة و تكون كتجاوب على تطلعات المواطنين و منغمسة في همومهم اليومية .
و عاد كنلقاو ان نفس الوجوه اللي دمرات المواطنين و شاركات في قتل الحقوق مرشحة اليوم بوجها جمر و كتقول حنا غنقودو التغيير، أتساءل معكم كيف ؟؟؟؟
معركة التغيير طويلة جدا و إيماننا بالحقوق و الحريات و العدالة الاجتماعية و المساواة و الديمقراطية راه كيبقى راسخ نقدرو نحصنوه بالاحتجاج و نقدرو نحصنوه بالعمل من داخل المؤسسات . و نحن دائما مع المواطنين نناضل جنب ومع المواطنين و ليس من أجلهم نترافع على قضايهم و نبني معهم آليات الدفاع الذاتي حتى تحقيق المغرب الذي نريد . دعمت رفاقي في الفدرالية لأنني اتق في مبدئيتهم و نضاليتهم و أتمنى لهم التوفيق . رغم أنني كنت أتمنى أن تتم مشاركتهم في الانتخابات على أساس تعاقد سياسي مع الدولة لتحقيق بعض المطالب الفورية و على رأسها إطلاق صراح جميع المعتقلين السياسيين .
3-حضرتي فعدة انشطة مؤخرا فاكادير و لي كانت ذات طابع سياسي و اجتماعي ممكن تقولي لنا سياقاتها و كيفاش كيبان لك النضال بجهة سوس ماسة
حضوري فبعض الأنشطة فمدينة أكادير هو جا في سياق مشاركتي في حملة اسمعني اللي دارتها مجموعة نساء شابات من أجل الديمقراطية. كان لي الشرف أنني نتقاسم مع عاملات جهة سوس ماسة همومهم و مشاكلهم و تجاربهم .
